Die Groot Jaco Jacobs Storieboek

R210.00

Vir die eerste keer word vyf van Jaco Jacobs se gewilde kinderverhale saam in een waarde-vir-geld omnibus uitgegee! Geniet hierdie fantastiese verhale oor onbeskofte feetjies, ’n geheimsinnige meermin, ’n superheld-boetie, ’n baie stink poets en ’n klomp raserige dinosourusse! Die omnibus bevat: Pasop vir die feetjies; Borrels; Superboetie; Koebaai, Gorilla en Die probleem met dinosourusse.

SKU: 9780799392401 Categories: , , , ,

Description

FORMAAT: Sagteband Boek

AANTAL BLADSYE: 208

OPSOMMING: Vyf fantastiese Jaco Jacobs-boeke in een omnibus!

Vir die eerste keer word vyf van Jaco Jacobs se gewilde kinderverhale saam in een waarde-vir-geld omnibus aangebied! Geniet hierdie fantastiese verhale oor onbeskofte feetjies, ’n geheimsinnige meermin, ’n superheld-boetie, ’n baie stink poets en ’n klomp raserige dinosourusse!

– Pasop vir die feetjies
Is daar regtig iets soos feetjies? Natuurlik nie! Wie glo nou in piepklein meisietjies wat kamma kan vlieg en heeldag blomme verf? Beslis nie die ondeunde tweeling Dieter en Pieter nie. Maar Lienke en Nonkwe glo in feetjies. Hulle glo daar bly feetjies in ’n ou boomstam in die biblioteek se tuin. Daarom besluit Dieter en Pieter om die meisies ’n poets te bak. Hulle maak superstink Feetjie-Vlug-Formule en gooi dit in die ou boomstam! Kort voor lank kry die tweeling ’n nare verrassing – twee omgekrapte, ongemanierde besoekers … ’n Prettige skaterlagstorie met ’n belangrike les – moenie met ’n feetjie skoorsoek nie!

– Borrels
Ontmoet vir Borrels! Sy is die nuwe meisie in Christo en Nelson se klas. Dit is nie net haar naam wat vreemd is nie … Borrels dra skulpe in haar hare. Sy bring haar goudvis saam skool toe. En sy het ’n GROOT geheim … Ontdek hoeveel pret dit kan wees as die nuwe meisie in jou klas ’n meermin is! ’n Verbeeldingryke storie met ’n bewaringstema, ideaal vir beginnerlesers.

– Superboetie
Ryno Rademan is moeg daarvoor om die oudste broer van ’n superheld te wees. Ja, jy het reg gelees. Sy bababoetie is ’n superheld. Die nag toe hy gebore is, het ’n meteoriet die dorp getref. Dit het hom spesiale kragte gegee. Hy red mense uit
brandende geboue en roei misdaad uit – al maak hy nog gereeld sy doeke vuil. Maar op ’n dag besluit Ryno se ma om sy bababoetie vir ’n kompetisie in te skryf … en hulle kom van aangesig tot aangesig met ’n baba-skurk! Kan Ryno sy boetie uit die kloue van die boosaardige baba red – voor dit te laat is?

– Koebaai Gorilla
WAARSKUWING! Hierdie storie STINK! Hein beland gedurig in die moeilikheid omdat sy beste pel, Morné, hom uitdaag om simpel goed aan te vang. Simpel goed soos om ’n asblik op sy kop skool toe te dra. Hein neem hom voor dat hy klaar is met hierdie soort grappies. Maar teen sy sin aanvaar Hein wéér sy Morné se nuutste uitdaging … Hy moet ’n hele week lank oorleef sonder ’n tandeborsel. Of vlos. Of pepermente. Of van daardie aaklige groen gorrelgoed. Hoe moeilik kan dit nou eintlik wees? Maar kort voor lank ruk dinge hand-uit … ’n Stink storie wat jou sal laat skaterlag … terwyl jy jou neus toeknyp!

– Die probleem met dinosourusse
As jou vriende ’n klomp REUSE, RASERIGE dinosourusse is, kan dinge nogal moeilik raak. Veral as hulle boonop saam skool toe gaan. Maar die probleem met dinosourusse … is dat jy nooit lank vir hulle kwaad kan bly nie!

SKRYWER: Jaco Jacobs is die gewilde skrywer van talle bekroonde topverkoperboeke vir kleuters, kinders en tieners. Sy skryfwerk wissel van prettige kinderrympies tot spokerige grilstories, van vermaaklike feiteboeke tot lekker skaterlagstories. Hy het reeds meer as 150 boeke die lig laat sien, en meer as ’n miljoen kopieë van sy boeke is verkoop. In 2014 is ’n fliekweergawe van sy jeugboek Suurlemoen! vrygestel, en ’n rolprent gegrond op Oor ’n motorfiets, ’n zombiefliek en lang getalle wat deur elf gedeel kan word is in 2017 uitgereik met die titel Nul is nie niks nie. ’n Goeie dag vir boomklim is met die Rapport/kykNET-prys bekroon, en is in 2017 as een van die wenners in die internasionale In Other Words-projek aangewys. Verskeie van sy boeke is alreeds wêreldwyd in Engels uitgegee. Onder Jaco se talle bekronings tel die Tienie Holloway-medalje, die Alba Bouwerprys, die Elsabe Steenbergprys, die MML-letterkundeprys en 26 ATKV-Kinderboektoekennings. Jaco woon in Bloemfontein saam met sy vrou, Elize, sy twee dogters, Mia en Emma, drie honde, ’n kat en ’n troetel-luislang.